शब्दांचे दान

आणिक काही नको देवा
शब्दांचे मज दान दे
तव निर्मित या सृष्टीचे
शब्दांकरवी अमृतपान दे...

विकारांची या करुनी होळी
शुद्ध चांदणे चमकुदे मनआभाळी
लेखणीतून उतरेल या असे
संवेदनांचे भान दे...

बनवी मज ज्ञानाचा चातक
अज्ञानावरी कोसळेन भयानक
तेजोमय शब्दबिंदुंची मज
आजन्म एक तहान दे...

शौर्याचे सागर कधी हळव्या भावनांचे आगर
कधी विराणी तर कधी आनंदाचे जागर
झंकारुनी उठतील सारेच रस
इतकी शब्दांना माझ्या जान दे...

कल्पनाकोकीळ गाई मंजुळ गायन
काव्यरसपानांती भ्रमरांचे मधुर गुंजन
पानाफुलातून वेलीतून ओसंडे चैतन्य
शब्दांचे असे चिरंतन हिरवे रान दे...

अंती थकेन मी झुकेन मी
या वाटेवर कधी चुकेनही मी
तुज्याजवळ पण येताना, चार शब्दांचा
या धरतीवर मला मान दे...

-- पंकज